聲夢1+2丨Duncan半裸騷肌玩水上遊戲 與劉詠彤大跳辣身舞
撰文： TOPick柴犬出動
發布時間： 2024/04/20 13:15
▲ 《聲夢1+2》紅隊合唱《Lydia》。
《聲夢傳奇》家族首個音樂綜藝《聲夢1+2》在今晚（4月20日）播出的第4集繼續玩轉澳門，邀來偶像選秀節目《亞洲超星團》的Archie（冼靖峰）、Dez（余宗遙）、Pako（區珀豪）和Sean（文佐匡）大戰《聲夢》畢業生，分成兩隊大比拼，分別是紅隊的Archie（冼靖峰）、Dez（余宗遙）、Venus（林沚羿）、Rock（何晉樂），對戰藍隊的Pako（區珀豪）、Sean（文佐匡）、Duncan（侯雋熙）、Angel（劉詠彤）。
今集《聲夢1+2》由頭到尾在水上樂園進行遊戲環節，內容依然爆笑，首個熱身遊戲「你超越我 我超越你 估歌仔」，製作組播出AI主持朗讀的歌詞後，兩隊需鬥快估歌名，知道歌名的隊員需要鬥快瀡過一條長滑梯後才能作答。
聲夢傳奇丨詹天文告別校園慶祝18歲生日 充滿笑聲淚水感受同學真摯友情
作為藍隊隊長的Duncan「輸人唔輸陣」，半裸騷巨胸兼結實腹肌出戰，相反《亞洲超星團》代表的Dez、Pako和Sean穿T恤上陣之餘，內裡更加配長袖潛水衣打底，當中Dez更著埋長褲，相當錫身。
「笠水隊長」Archie全程聲控指揮隊員，獲委派出動的Dez將歌曲《食軟雪糕》講錯為《軟雪糕》，其後Dez不甘心在鏡頭前踢爆Archie是「膽小老鼠屎」：「隊長話佢唔想落嚟，就派我落嚟，佢同我講係《軟雪糕》，我問咗佢3次『You sure?』，佢話『Very certain』。落到嚟，差個食字，唔食點有軟雪糕吖！」Venus則全程邊瀡邊瘋狂尖叫，隔著屏幕也感受到有多刺激。
Rock踢爆余宗遙有「辨色」困難
另一遊戲「彈彈琴大逃脫」亦相當抵死，兩隊分開輪流限時作賽。遊戲方法是每隊派出一名隊員／隊長根據特製的樂譜彈琴，其餘三名隊員則各自穿上三個水泡聽琴聲「估歌仔」，答中歌名者可除下身上一個水泡，當除掉身上所有水泡後，該名隊員可「逃脫」。
當限時一到，預先安排好的大水桶便會淋水懲罰還未成功逃脫的隊員，而在限時內除得最多水泡的一隊為之勝出，該遊戲關鍵是需要在短時間內分辨顏色及圖案，結果「綠色橙色傻傻分不清」的Dez成為老鼠屎。
不過講到最刺激，必定是「你估我唱乜」，每隊派出一隊員／隊長在滑道上高歌，其餘三名隊員分別站在不同的遠距離位置收聽後，再趕往集合討論是哪首歌。紅隊派出Angel邊坐橡皮艇邊獻唱《電燈膽》，可惜卻因為一個原因要「重賽」。
另邊廂藍隊的Rock需獻唱《友共情》，隊員聽畢趕著前往討論之際，隊長Archie卻滋悠淡定慢慢行，盡顯「胸有成竹」一面。
Archie與Rock合唱《怎麼捨得你》
至於擂台比拼唱歌環節，藍隊Pako、Sean、Duncan和Angel合唱《活著VIVA》，紅隊Archie、Dez、Venus和Rock合唱《Lydia》。
第二回合則重演《聲夢傳奇》時比賽環節，Archie與Rock合唱《怎麼捨得你》，Duncan和Angel邊唱邊跳辣身舞《Trouble Maker》，更重現「爆衫」騷肌經典一幕。
